Киро Донев
300 ден.
160 стр., 200 х 140 мм, 2025
Овој еколошки роман, пред сè, им е наменет на децата и младите, чијашто иднина зависи од нивниот однос кон Природата, кон нејзиниот севкупен животински и растителен свет, ама и кон нивната животна околина. Приказната во него е и порака и апел, децата никогаш да не потклекнат пред предизвиците на модерната наука и техника кога се во прашање природата и средината во којашто живеат. Но, и не само ним, туку книгава им е наменета и на сите оние коишто сакаат да придонесат и да помогнат да се промени начинот на размислување и однесување кон мајката Природа и планетата Земја, чијшто животински и растителен свет, сè повеќе неповратно исчезнува од пред нашите очи.
На страниците на оваа книга, Природата не е насликана со фотографска точност, туку живо е пренесена, пресоздадена со сите нејзини бои и мириси, со сите нејзини светлини и облаци, со сиот нејзин и голем и мал, невидлив свет, крај кого минуваме а не го забележуваме.
***
Киро Донев е роден на 21 март 1942 година во с. Моноспитово, Струмичко. Завршил Учителска школа во Штип и Филозофски факултет – група Југословенска книжевност со македонски јазик во Скопје. За време на студиите бил редовен соработник во студентските и младинските весници „Студентски збор“ и „Млад борец (каде што објавувал главно раскази за возрасни, репортажи и хумористично-сатирични творби).
Една година работел како учител во родното место, а потоа (од 1965 г.) целиот работен век го помина во редакцијата на „Детска радост“ при НИП „Нова Македонија“, првин како новинар, потоа, одговорен уредник на неделникот за деца и млади „Наш свет“ и литературното списание „Развигор“. Соработувал и објавувал свои трудови и во „Нова Македонија“, „Колибри“ и во речиси сите списанија и весници за деца во некогашните југословенски републики, но и во весници за возрасни: „Студентски збор“, „Млад борец“, „Остен“, а во весникот „Вечер“ две години уредувал две страници за хумор и сатира кои сам ги подготвувал. Се пензионира како директор и главен и одговорен уредник на „Детска радост“.
Киро Донев е автор на педесетина литературни дела за деца, млади и за возрасни. Пишува романи, раскази, песни, ТВ и радиодрами, текстови за сликовници за најмладите, сценарија за играни ТВ серии, составил неколку антологии... Повеќепати е наградуван, а највисоки признанија од областа на литературата му се наградата „Ванчо Николески“, доделена од Друштвото на писателите на Македонија, „Гоцева повелба“ на манифестацијата „Гоцеви денови“, наградата „Мала вила“ на 21 Меѓународен детски фестивал „Везени мост“ во Тузла, Босна и Херцеговина. Дел од неговото творештво, претежно романи, се преведени на турски, српски/хрватски/босански, бугарски, унгарски, украински и албански јазик, а негови песни и раскази се објавени на многу јазици.
Долг период (од 1970 г.) беше член на Друштвото на писателите на Македонија.
Живее во родното Моноспитово, Струмичко.
Повеќето од книгите на Киро Донев се наменети за деца од помала возраст – од пет-шест до дванаесетгодишна возраст. Карактеристично за него е што во некои прозни дела раскажува во рима, со стихувани реченици и може да се доживува како своевидна поезија во проза, исполнета со инвентивен хумор. Киро Донев има свој препознатлив стилско-лексички исказ, духовит и динамичен ритам со рима и во македонската литература има високо реноме на голем мајстор на прозата за деца од помала возраст. Тој е меѓу најдобрите и најпопуларните македонски автори за деца за помала возраст.